waziri awashukia watenda mgodini

 
Mirerani. Waziri wa Nishati ya Madini, George Simbachawene amewataka wawakilishi wa Serikali kwenye Mgodi wa Tanzanite One kutekeleza wajibu wa kulinda masilahi ya Taifa.

Mgodi huo unamilikiwa kwa ubia kati ya Serikali na Kampuni ya Sky Associate Ltd.

Akizungumza wakati wa kuzindua kamati ya pamoja ya kuendesha mgodi huo, Waziri Simbachawene alisema wakati mbia Sky Associate akifanya kazi nzuri, mbia mwingine ambaye ni Kampuni ya Serikali ya Stamico, watendaji wake hawaonekani kutekeleza wajibu wao kikamilifu.

“Hatujaona faida yenu hapa...sioni uwajibikaji wenu, hakikisheni mnalinda masilahi ya Serikali,” alisema Simbachawene.

Waziri Simbachawene alisema haiwezekani watendaji wa Serikali katika mgodi huo wawe sehemu ya malalamiko, badala ya kushirikiana na mwekezaji kuongeza uzalishaji.

Hata hivyo, waziri huyo aliipongeza Sky Associate kwa kuendelea kupanua mgodi huo na kuagiza kampuni hiyo kutekeleza ahadi zake, ikiwamo kusaidia jamii inayozunguka mgodi huo.

Aliwataka watendaji wa Wizara ya Nishati na Madini kuhakikisha wanaondoa matatizo ya mipaka katika mgodi huo na kuhakikisha kila mchimbaji anachimba katika eneo lake.

Mwenyekiti wa kamati ya kuendesha mgodi huo, Faisal Juma alisema watahakikisha wanatekeleza ahadi zote walizokubaliana na Serikali katika kuhakikisha pande zote zinanufaika.

Juma alisema tayari ahadi nyingi zimetekelezwa na wanaendelea kuhakikisha Watanzania wananufaika na Madini ya Tanzanite.

Mkurugenzi wa Kampuni ya Sky Associate, Hussein Gonga alisema kama wabia wanaishukuru Serikali kwa kuzindua kamati hiyo, kwani itasaidia uwajibikaji na uwazi katika kufanya kazi.

Kwa upande wake, Kamishna wa Madini, John Nayopa alisema wizara itaendelea kusimamia sheria za uchimbaji madini na kudhibiti uuzwaji holela madini ya Tanzanite.

“Tayari imeundwa kamati ya maridhiano baina ya wachimbaji wadogo na wawekezaji, tuna imani itasaidia kupunguza migogoro ya Mirerani,” alisema Nayopa