BAJETI YA ZAIDI YA BILIONI 63 YAPITISHWA MANISPAA YA SONGEA KWA MWAKA WA 2017/2018

Baraza la Madiwani wa Halmashauri ya Manispaa ya Songea Mkoa wa Ruvuma limepokea,kujadili na kupitisha Bajeti ya mwaka 2017/2018 ya zaidi ya sh.bilioni 63 na milioni 796.

Akiwasilisha bajeti hiyo Mchumi Mkuu wa Manispaa hiyo Raphael Kimary amebainisha kuwa kati ya fedha hizo zaidi ya sh.bilioni 16 ni za miradi ya maendeleo ambazo ni ruzuku kutoka serikali kuu na sh.bilioni 1.785 ni fedha za maendeleo.

Kwa mujibu wa Mchumi huyo fedha za matumizi ya kawaida ambazo ni ruzuku toka serikali kuu zimetengwa zaidi ya sh.bilioni 3.893 na matumizi ya kawaida kutoka vyanzo vya ndani zimetengwa zaidi ya sh. bilioni 1.533.

Amesema mishahara ya watumishi zimetengwa zaidi ya sh.bilioni 40 na nguvu za wananchi zimetengwa zaidi ya sh.milioni 175.

Kimary ameliambia Baraza la Madiwani la Manispaa hiyo kuwa uandaaji wa Mpango wa Bajeti ya mwaka huu wa fedha imezingatia Miongozo na maelekezo mbalimbali ya serikali ikiwemo ukusanyaji wa mapato na utengaji rasilimali fedha kwa ajili ya utekelezaji wa Mpango wa maendeleo wa Taifa wa miaka mitano (2016/2017 hadi 2020/2021).

Amebainisha bajeti hiyo imejikita katika sekta kipaumbele nane ambazo zimepatiwa mafunzo ya utekelezaji.Amezitaja sekta hizo kuwa ni zilizopo katika Wizara ya Afya, Maendeleo ya Jamii,Wazee na Watoto,Wizara ya Maji na Umwagiliaji na Wizara ya Ujenzi, Mawasiliano na Uchukuzi.

Sekta nyingine zilizopewa kipaumbele katika bajeti hiyo ni kutoka Wizara ya Kilimo,Mifugo na Uvuvi, Wizara ya Elimu,Sayansi na Teknolojia,Wizara ya Fedha na Mipango,Wizara ya  Viwanda, Biashara na Uwekezaji na Wizara ya Nishati  na Madini.

Amesisitiza bajeti hiyo pia imezingatia Hotuba ya Rais aliyoitoa katika Bunge la 11,Hotuba ya Waziri  Mkuu  ya Januari mwaka huu katika Mkoa wa Ruvuma ambayo ilikuwa na masuala mtambuka na maelekezo ya viongozi wa Mkoa na Taifa kwa ujumla.